សេចក្តីជូនដំណឹង | សារ ក្នុងឱកាសនៃខួបប្រតិបត្តិការគម្រប់៦ឆ្នាំ

នៅថ្ងៃទី 05 ខែឧសភា ឆ្នាំ2015 យើងបានចាប់ផ្តើមប្រតិបត្តិការរបស់យើង ជាមួយនឹងបេសកម្មក្នុងការផ្តល់ជូនអតិថិជននៅក្នុងសហគមន៍ដែលស្ថិតក្នុងព្រះរាជាណាចក្រកម្ពុជា នូវឱកាសស្មើភាពគ្នាក្នុងការទទួលបាននូវសេវាហិរញ្ញវត្ថុ មិនថាពួកគេជានរណា ឬស្ថិតនៅទីកន្លែងណានោះទេ។

នៅថ្ងៃនេះ យើងមានមោទនភាពក្នុងការជម្រាបជូនថា បេសកម្មរបស់យើងមិនមែនជាក្តីសុបិន្តទេ ព្រោះយើង សម្រេចវាបានយ៉ាងពិតប្រាកដនៅក្នុងពេលឆាប់ៗខាងមុខនេះ។ ជាមួយនឹងការដាក់ឲ្យដំណើរការនូវប្រព័ន្ធសេវាកម្មហិរញ្ញវត្ថុបែបឌីជីថលរបស់នៅពេលខាងមុខនេះ យើងសង្ឃឹមជឿជាក់ថា យើងអាចផ្តល់ជូនលោកអ្នកនូវសេវាកម្មហិរញ្ញវត្ថុដែលល្អប្រសើរជាងមុន ដើម្បីលើកកម្ពស់កម្រិតជីវភាពរស់នៅរបស់អតិថិជននៅក្នុងសហគមន៍បានយ៉ាងទូលំទូលាយជាងមុន ជាពិសេសទៅដល់ក្រុមអតិថិជនដែលមិនធ្លាប់ទទួលបានសេវាហិរញ្ញវត្ថុពីមុនមក។

យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះអតិថិជន និងដៃគូសហការទាំងអស់របស់យើង ដែលបានចូលរួមក្នុងប្រតិបត្តការនេះជាមួយយើង។ ការធ្វើប្រតិបត្តិការរបស់យើងមិនមានអ្វីដែលអស្ចារ្យនោះទេ តែយើងបានយកឈ្នះលើឧបសគ្គជាច្រើនដែលបានជួបប្រទះនៅក្នុងរយៈពេល៦ឆ្នាំនេះ ហើយអ្វីដែលសំខាន់បំផុតនោះ គឺវាជាមេរៀនជីវិតថ្មីមួយដែលយើងបានឆ្លងកាត់ដែលនឹងដឹកនាំយើងនៅក្នុងបេសកកម្មរបស់យើងឆ្ពោះទៅក្នុងឆ្នាំបន្តបន្ទាប់ខាងមុខទៀត។

ជាចុងក្រោយ យើងខ្ញុំមានការសោកស្តាយយ៉ាងខ្លាំងចំពោះការឆ្លងរីករាលដាលនៃជម្ងឺកូវីដ ១៩ នាពេលថ្មីៗនេះ ដែលបានបង្ករឲ្យមានផលប៉ះពាល់ដល់ជីវភាពរស់នៅរបស់ប្រជាជនជាច្រើនគ្រួសារ។ ដោយស្របគ្នាទៅនឹងការតាំងចិត្តរបស់យើងក្នុងការលើកតម្កើងកិច្ចការផ្តល់ឥណទានប្រកបដោយការទទួលខុសត្រូវខ្ពស់ក្នុងសហគមន៍ផងនោះ យើងនឹងដាក់ឲ្យដំណើរការក្នុងពេលឆាប់ៗខាងមុខនេះ នូវឥណទានដែលមិនមានការប្រាក់របស់យើង ដែលមានឈ្មោះថា កម្មវិធីផ្តល់ ឥណទានគាំពារ ក្នុងវិបត្តិកូវីដ ដើម្បីជួយទៅដល់អតិថិជននៅក្នុងសហគមន៍ដែលបានទទួលរងនូវផលប៉ះពាល់នេះ ដើម្បីជម្នះនូវពេលវេលាដ៏លំបាកដែលមិនធ្លាប់មាននេះ។

ភាពជោគជ័យរបស់អ្នកទាំងអស់គ្នា គឺជាជោគជ័យរបស់យើងខ្ញុំ! សូមអនុញ្ញាតិឲ្យយើងខ្ញុំជួយគាំទ្រអ្នកឲ្យមានការរីកចម្រើន!

ពីយើងខ្ញុំទាំងអស់គ្នា នៃគ្រឹះស្ថានមីក្រូហិរញ្ញវត្ថុ សម្បត្តិ ហ្វាយនែន