សម្បត្តិ ហ្វាយនែន ចូលរួមកម្មវិធីមនុស្សធម៌កុមារកម្ពុជា

Author

Digital Marketing

Posted On

26, ខែតុលា, 2021

រាជធានីភ្នំពេញ ថ្ងៃព្រហស្បតិ៍ ទី២៣ ខែកញ្ញា ឆ្នាំ២០២១ ៖ តំណាងគណៈគ្រប់គ្រង និងបុគ្គលិក សម្បត្តិ ហ្វាយនែន បាននាំយក សម្ភារសិក្សា គ្រឿងឧបភោគបរិភោគ និងថវិកាសរុបជាទឹកប្រាក់ចំនួន ៥,០០០,០០០ រៀល ជូនដល់ មណ្ឌលកុមារកំព្រា មែកឈើ ដែលស្ថិតនៅ ភូមិលិចវត្ត សង្កាត់កំបូល ខណ្ឌដង្កោ រាជធានីភ្នំពេញ។

ក្នុងដំណើរទស្សនៈកិច្ចមនុស្សធម៌នេះ តំណាងគណៈគ្រប់គ្រងបានចុះជួបផ្ទាល់ និងសំណេះសំណាលជាមួយក្រុមការងារមណ្ឌល ដែលកំពុងមើលថែក្មេងៗនៅទីនោះសរុបប្រមាណជាង ៧០នាក់។ នៅទីនោះ ក៏មានកន្លែង ចិញ្ចឹមសត្វ ដាំដុះ ដំណាំ បន្លែ ផងដែរ ដោយលោកអនុប្រធានមណ្ឌលបានមានប្រសាសន៍ថា៖ “ខ្ញុំមិនទុកដីឲ្យនៅទំនេរឡើយ”។ ជាការពិតណាស់ការដាំបន្លែ និងការចិញ្ចឹមសត្វ គឺជាកត្តាសំខាន់សម្រាប់ កូនៗ ក្មេងៗ ដែលនៅមណ្ឌលនោះ ព្រោះវាបានជួយធ្វើឲ្យពួកគាត់ស្គាល់ច្បាស់ពីការដាំដុះ និងការចិញ្ចឹមសត្វក៏ដូចជាជួយឲ្យពួកគាត់មានការងារធ្វើចៀសវាងទុកពេលទំនេរពីការរៀនសូត្រ។ ម្យ៉ាងវិញទៀតពួកគាត់ក៏អាចសម្រួលដល់ការបរិភោគប្រចាំថ្ងៃរបស់ពួកគាត់ ព្រោះពួកគាត់អាចយកបន្លែទាំងនោះទៅធ្វើជាបន្លែ និងធ្វើជាមុខម្ហូបផ្សេងៗបានផងដែរវាពិតជាមានអត្ថប្រយោជន៍ខ្លាំងណាស់។

លោក សឿង ស៊ីម៉ុន នាយកប្រតិបត្តិ គ្រប់គ្រងទូទៅ សម្បត្តិ ហ្វាយនែន បានផ្តល់ដំបូន្មានដ៏ល្អមួយដល់កូនៗ ក្មេងៗថា ៖ “ ប្អូនៗ ក្មួយៗ កូនៗ ត្រូវខិតខំសិក្សារៀនសូត្រដោយយកចិត្តទុកដាក់ជានិច្ច ព្រោះថា មានតែចំណេះដឹងទេ ដែលអាចផ្លាស់ប្ដូរអនាគត“ ។ កុមារគឺជាទំពាំងស្នងឬស្សី ដូច្នេះកុមារទាំងអស់ត្រូវខិតខំសិក្សាររៀនសូត្រដើម្បីជាស្ពាននាំយើងឈានទៅរកអនាគតប្រសើរបាន។ ជាមួយការរួមចំណែកដ៏តិចតួចពី សម្បត្តិ ហ្វាយនែន លើកនេះយើងខ្ញុំទាំងអស់គ្នាសង្ឃឹមថា ប្រជាជនកម្ពុជាជាច្រើនអាចចូលរួមជាមួយពួកយើងដើម្បីគាំទ្រ និងយកចិត្តទុកដាក់ចំពោះកុមារទាំងនេះ ដែលជាអ្នកស្នងដំណែងជំនាន់ក្រោយ។